ومدام اسمه عمر، لابس صليب في إيده ليه؟!

من يومين لقيت صحابي باعتين لي السكرين شوت دي.

لما قرأت التعليق على البوست اللي أعلن فيه فريق لغم عن إنضمامي لهم كمغني، قلت لازم أرد عليه بشكل جميل، فا قعدت كده ولعت سيجارة وجبت النسكافيه وقعدت أكتب كومنت صغير، وسرحت لغاية ما لقيت الكلام طول والموضوع تشعب، فا قلت أخليه مقالة واحطها في الكومنت لأن فعلاً في معلومات روشة فشخ، من وجهة نظري الشخصية جداً الغير ملزمة لأي حد خالص في أي حاجة.

هاقول لك لابس "صليب" ليه. بس عشان تفهم الموضوع هحتاج أجيب لك أصل القصة.

الشكل ده من الصليب كان بيتعلق على بدلة الظابط المتميز في الجيش الألماني النازي في الحرب العالمية الأولى والثانية، وبيسموه بالانجليزي "Iron Cross". وده كان نيشان بيتعلق على البدلة الميري الألماني كرمز للشجاعة والشرف.

اتهزمت ألمانيا والجنود الأمريكان رجعوا أمريكا، وكتير منهم كان واخد الIron Cross ده من النازيين المهزومين في معارك الحرب العالمية. وكان ان انت تمشي معلق النيشان ده في رقبتك أو تلبسه خاتم أو تعمله تاتوو أو أي حاجة وانت شاب لسة راجع من الحرب دي رمز للقضاء على الفاشية. بمعنى، كأنك بعد ما رجعت من الحرب مع الألمان بتقول "الفاشي اللي كان بيقمع الناس وبيدمر العالم، احنا فشخناه وآدي النيشان اللي كان فرحان بيه أهو معايا".

طيب، الكلام ده لو تاخد بالك كان بعد الحرب العالمية التانية ١٩٤٥ وده نفس الوقت اللي الروك آند رول ابتدى ينشأ فيها في أمريكا في بداياته خالص، وكان أفارقة أمريكا رواد الموسيقى دي، وبما ان العنصرية كانت لسة قوية في أمريكا، فكان الروك آند رول مغضوب عليه أصلا من قبل ما يبتدي لأن العاملينه "السود" "العبيد" "الشياطين" في الخمسينيات، لغاية ما ناس زي چيري لي لويس وإلڤيس پريسلي وغيره ابتدوا يلعبوا المزيكا دي وبالتالي الجيل الجديد ابتدى ينجذب لنوع الموسيقى دي، واللي عندها الموقف تفجر في المجتمع الأمريكي المحافظ لمواجهة "زحف موسيقى الشيطان" وبالتالي الروك آند رول كان في مواجهة المجتمع وتسلطه وبيحاول يخرج عن سيطرته وقمعه العنصري للأفارقة.

إمشي في الزمن قدام كده بتاع ١٥ سنة، احنا دلوقتي في الستينيات ومجتمعات البيض المحافظة في أمريكا نفسهم لسة بيقولوا على الروك ده مزيكا الشيطان وبتاعت عبيد ولازم تتمنع وفعلا تم تنظيم مؤتمرات وتقديم طلبات للكونجرس الأمريكي لمنع الموسيقى دي ومعاقبة ممارسيها وسامعيها من وقتها. واتكرر الموضوع ده كذا مرة على فترات من الستينات وحتى أواخر التمانينات أو أوائل التسعينات أعتقد. نوع الموسيقى دي في الستينات لاقى قبول واسع عند جيل الشباب اللي عانى من ويلات الحروب في صغره وتقريباً مفيش بيت أمريكي من الجيل ده لم يعاني من خسارة بسبب الحرب العالمية سواء بفقد أب أو عم أو أخ كبير في الحرب، أو اللي رجعوا من الحرب وعانوا من مشاكل نفسية نتيجة تعرضهم لويلات الحرب وطبعاً معاناتهم اتنقلت معاهم لعائلاتهم أما رجعوا.

وتنامت شعبية موسيقى الروك في الوقت ده واحتد الصدام في المجتمع بين تيار السلطة الأبوية المحافظة الأمريكية المتدينة اللي بتروجلها البروباجاندا الأمريكية وقتها وبين رغبة الجيل الجديد في التحرر من قيود المجتمع الموروثة القديمة.

ومن هنا يا سيدي الفاضل جه لبس الصليب الحديدي، اللي آبائهم جابوه من الحرب كرمز لهزيمة الفاشية، واستخدمه الجيل الجديد للرمز للتمرد على السلطة الأبوية والتمرد على العنصرية والظلم والقهر والفاشية الفكرية بصورها المختلفة.

وأصلا فكرة الروك آند رول قائمة على التمرد عالظلم، على الحكم عالناس بشكلهم، تمرد على القيم اللي أي مجتمع عايز يفرضها على أبناءه بالعافية عن طريق تقييد حريته وفرض وصاية عليه، تمرد على التحكم في الناس وجعلهم نسخ من بعض، وبالتالي الحرية والسعي للحرية في التعبير عن النفس من خلال الفن. ومن هنا التقت موسيقى الروك و لبس الصليب الحديدي في مواجهة تيار الجيل القديم المحافظ والتعبير عن تطلعات الجيل الجديد لعالم أكثر سلاماً وسعادة بدون فاشية، بدون عنصرية، بدون ظلم وقمع وتمييز بين الناس على أساس لون أو عرق أو دين.

وبالتالي مع مرور الزمن ارتبط رمز الصليب الاسود بالروك ومنه للميتال وتطوراته وأصبح رمز للتمرد على الفاشية والعنصرية والعبودية والأفكار المحافظة والظلم والتمييز على أساس لون البشرة أو الدين أو العرق بكل أشكاله .

وبعدين يعني انت سيبت الباند والأغاني والصور المزيكا وهو ده اللي قررت تعلق عليه؟!

انت فارق معاك في إيه كوني مسلم ولا مسيحي ولا ملحد ولا حتى باعبد الزحلفة؟ ايه الغرض من السؤال؟ البوست بيقول لك رحبوا معانا بمغني جديد، بنقدم موسيقى، فن، رسالة، فكرة، هوبا كاميلة، انت بقى جيت مهتم بأي حاجة من الحاجات الجميلة دي ومسكت في حاجة تافهة زي دي ليه؟

عايز تقول انك يعني استنتجت من إسمي إني أكيد مسلم والمفروض ان لبس الصليب ده بتاع "المسيحيين الكفار عباد الصليب الوحشين" أو عايز تقول "إنت ازاي تلبس رمز لدين غير دينك؟" على افتراض انك عارف ديني وعارف المفروض أعمل وماعملش ايه؟ ما تخليك صريح؟ وكأن يعني لازم يكون في نبذ أو تنافر بين الاتنين؟

بصرف النظر عن الإجابة، في الآخر سؤالك ده يحمل في طياته كراهية سواء عن قصد أو غير قصد. نوع الكلام ده بيحض عالكراهية. للأسف، مجرد سؤالك يعتبر كده. هتقول لي "انت ازاي عرفت هو انت دخلت جوا دماغي؟ أنا بس باعلق عشان يعني انت كده مش متسق مع نفسك فانت المفروض تحترم دينك" قال يعني كده شكلها أشيك؟! ساعتها هاقول لك برضو ملكش دعوة لأنه موضوع ميخصكش ومش هيأثر على حياتك بأي شكل من الأشكال، فا التدخل فيه يعتبر قلة أدب. فا سواء كده أو كده برضو السؤال في حد ذاته يصنف خطاب كراهية.

أنا مدرك ان انت ممكن تكون ماتقصدش فعلا تحض على كراهية ولا في دماغك حاجة من دي خالص، فا حبيت أوضح لك معنى اللي انت قلته، لو ماكنتش عارف أديني وضحت لك بقدر الإمكان. وبرضو اللي ميعرفش يستفيد ويقدر كمان يشارك المقال مع حبايبه.

اسمع المزيكا بتاعت لغم الجديدة أما تنزل يا مان، عاجباك، خير وبركة، مش عاجباك، خير وبركة برضو عادي. إنما هتقعد بقى تخش في بنطلوني وتسألني دينك ايه وملة اللي جابوني ايه؟ انت مالك يا مان؟ أنا بنطلوني على مقاسي بالظبط مش هينفع تخش فيه معايا!